ASH EMISSION ACTIVITIES SANG BULKAN KANLAON, POSIBLE PA MASUNDAN SUNO SA PHIVOLCS
Posible nga masundan pa sa masunod nga mga inadlaw ang pagbuga sang aso kag abo sang bulkan kanlaon las-5 kahapon, September 8,2025.
Sa interview sang DYHB kay Philippine Volcanology and Seismology (Phivolcs) Director Teresito Bacolcol, ginpahayag sini nga tatlo ka bulan na ang naglabay humalin sang ulihi nagbuga sang abo kag aso ang bulkan. Ini amo ang narekord sang June 5,2025.
Suno kay Bacolcol, may natipon nga pressure kag gas sa sulod sang bulkan rason nga ginpagwa niya ini.
Ang ash emission activity kahapon ang naglawig malapit sa isa ka oras.
Sa gihapon, hugot nga ginadumilian sang Phivolcs ang pagsulod sang mga tawo sa 4 km permanent danger zone.
Paaathag pa sini nga bisan pa mag Alert Level 0 ang bulkan, posible sa gihapon magluntad ang ash emission kag phreatic eruption.
Sa karon, nubo ang mga narekord nga volcanic earthquake sa bulkan samtang gamay lang ang ginsaka aang sulfur dioxide nga ginabuga sini.
Suno pa kay Bacolcol, ang ginapakita nga aktibidad sang bulkan subong amo ang parameters man sa idalom sang Alert Level 2.