Padayun nga ginapatigayon sang Police Regional Office Negros Island Region (PRO- NIR) ang manhunt operation agud madakpan ang isa ka preso nga nagapalagyo gikan sa kustodiya sang EB Magalona Municipal Police Station.
Ang nagpalagyo nga preso ginkilala nga si Eduardo Sadia, alyas Bebeng, 58-anyos, isa ka manug-pangisda kag residente sang Sitio Panaosawon, Brgy. Tuburan sang nasambit nga banwa.
Kasunod sini, ginmandu na ni PRO-NIR Director PBGEN Arnold Thomas Ibay ang the Negros Occidental Police Provincial Office (NOCPPO) nga mas pasangkaron pa ang province-wide dragnet kag manhunt operation agud liwat nga madakpan si Sadia.
Mas ginhugtan naman sang kapulisan ang security protocols sa tanan nga custodial facilities sa bilog nga probinsya kag bug-os nga NIR agud indi na matabo ang kaangay nga insidente.
Ginpasiguro man ni PBGEN Ibay ang publiko nga ginapatigayon sa karon ang nagakaigo nga tikang agud madakpan ang nagpalagyo nga preso.
Nagahinyo man ini sa publiko nga magpabilin nga kalmado, vigilante kag magkooperar pinaagi sa pag-report sa kapulisan pananglitan may ihibalo sa lokasyon ni Sadia.
[Photo from EB Magalona PNP]