Maga-imbestigar maga-expose kag maga-prosecute.
Ini ang mandato sang gintukod nga Concerned Citizens Council nga ginatapuan sang mga kapari-an sang Diocese of Bacolod, mga Abogado, Engineers, Civil Society kag progressives groups.
Suno kay Fr. Mao Buenafe nga nagaserbe bilang convenor sang ‘C3’, natukod ang grupo sa atubang sa mainit ng isyu sang korapsyon sa flood control projects sang DPWH kun sa diin naulamid ang mga opisyal sang gobyerno kag elected officials.
Nagapanindugan man ang ang council nga indi mangin ningas-kugon ang ila himuon ang imbestigasyon kundi dapat may manabat gid kag mapriso.
Para naman kay Fr. Julius Espinosa, Social Action Director sang Diocese sang Bacolod, handa ang simbahan agud mangin venue sang sentimento kag kaakig sang tawo kag sa paghimo sang mga tikang pinaagi sa mass mobilization kun kinahanglanon.
Suno naman kay Atty. Cesar Beloria, magasugod ang ila imbestigasyon sa mga flood control projects sa Bacolod nga ginalantaw may anomaliya.
Magabukas man sila sang Website kag facebook page para sa ihibalo,impormasyon kag ‘sumbungan’ sang publiko.
Samtang, ginklaro naman ni anay Bacolod City Councilor Atty. Renecito Novero nga wala ini bahid sang politika.