Nagdangat na sa 963 ka mga indibdiwal ukon 314 ka mga pamilya ang apektado sang sunog nga nagluntad pasado las-12 kaina sang kaagahon, Setyembre 12 sa Barangay 27, ciudad sang Bacolod.
Ini ang sandig Situationer Report sang Bacolod Disaster Risk Reduction and Management Office as of alas-4 sini nga hapon kun sa diin tatlo ka mga purok nga sakop sang Barangay ang nahalitan.
Base sa report, yara na P4.5 Million ang kabug-usan nga halit nga ginbilin sang kalayo nga ginalakipan sang 232 ka totally damage nga panimalay samtang duha ang partially damage.
Sa karon, ang mga apektado ang nagapabilin nga yara sa Apolinario Mabini Elementary School nga nagaserbe bilang evacuation center.
Padayun man nga nagapadul-ong sang bulig ang city government sang Bacolod kag ang pila ka grupo kag organisasyon agud mahatag ang pila ka mga kinahanglanon sang mga apektado.
Wala naman sang may narekord nga casualty matapos nagluntad ang insidente nga naglawig sang kapin tatlo ka oras.