Paga-issuehan sang second notice sang Business Permits and Licensing Office (BPLO) ang mga vendors sa Asenso Market sa Barangay Alijis kun indi pa gid ini mag-comply sa pagkuha sang business permit.
Sa interview sang DYHB kay City Legal Officer Atty. Karol Joseph Chiu, ginpahayag sini nga una na sila nagpagwa sang notice sa mga nagabaligya sa lugar sang Setyembre 4, 2025.
Suno kay Chiu,kun indi pa gid nila ma-comply ang ini nga requirement, buot silingon nga wala man sila sang kinamatarong nga mag-operate kag ang ciudad na ang magapasira sa ila.
Sa karon, ginapa-survey pansa City Engineer’s Office kun bala ang natindugan sang Asenso Market ang makabig nga road lot.
Una naman ginpahayag ni Punong Barangay Donny Dela Vega nga temporaryo lamang ang pagbaligya sa lugar kag handa ini batunon ang mangin desisyon sang ciudad sa mga vendors.
Una naman nga ginpahayag ni Councilor Celia Flor, chairperson sang Committee on Markets sa Sangguniang Panlungsod nga na-tolerar na lang ang pagbaligya sa Asenso Market.