PROVINCIAL CAPITOL – Pagakuhaon sa quick response fund sang Office of the Civil Defense ang dugang nga pundo nga gin-request sang mga local government units nga apektado sang paglupok sang Bulkan Kanlaon.
Ginpahayag ni OCD-Negros Island Region Director Donato Sermeno III nga ang request sang natungdan nga mga LGUs sa national government nga ginpaagi sa Department of Budget and Management (DBM) ang ginpasa sa OCD.
Apang ginpabutyag ni Sermeno nga indi masarangan sang QRF sang OCD ang kapin P203 million nga una nga ginhingyo sang mga LGUs.
Bangud sini, liwat nga ginpasumiter sang proposal ang mga LGUs kag pagalantawon sang OCD kun ano nga mga items ang masarangan nga mapunduhan sang ila nga QRF.
Kabug-usan nga P40.857 million ang gin-request ni Sermeno kag maga-depende na sa OCD Central Office kun ano nga mga items ang hatagan sang prayoridad kag mapunduhan.
Suno kay Sermeno, ang iban nga proposals ang ginlakip naman sa Kanlaon Recovery and Development Plan agud nga mahatagan sang nagakaigo nga budget.