BACOLOD CITY- Gindayaw ni Senator Risa Hontiveros ang grupo nga magapatigayon sang protesta kontra korapsyon kadungan sang padumdum sang Martial Law sa Domingo, September 21, 2025; kaangay sang grupo nga gindihon sa ciudad sang Bacolod nga Concerned Citizens Council (C3).
Ginpahayag ni Senator Hontiveros nga iya ginpakamaayo nga nagatingog ang pumuluyo angot sa indi pagbaton sang lapnagon nga korapsyon sa pungsod Pilipinas sini nga tuig kag sang nagligad, lakip naman dira ang issue sa mga flood control projects.
Nagapanawagan man si Hontiveros sa mga kabataan kag mga estudyante nga magpartisipar sa protesta agod sila ang magpakigbato sang ila kinamatarong kag ipakita nga sila ang nagapamatok sa korapsyon.