Suspek ginaalegar ginsugo sang bayaw ka biktima sa pagpamuno sa Brgy Estefania
Gina-alegar sang suspek nga ini ang ginsugo sang bayaw ka biktima sa pagpamuno sa Purok Sagrado 2, Barangay Estefania sa ciudad sang Bacolod, pasado las-7 sang aga, Domingo nga adlaw, Setyembre 21.
Ang biktima ang ginkilala nga si Jisson Villegas, 31-anyos, construction worker; samtang ang suspek amo si Hermogenes Rico nga pareho residente sa amo nga lugar
Base sa interview sang DYHB sa suspek nga si Rico, Sabado sang gab-i niya ginhimo ang krimen kun sa diin may upod ini siya nga nagkapyot kay Villegas kag siya ang nangamot sa pagpamuno apang iya gina-alegar nga ginsugo lamang siya sang bayaw ka biktima.
Gina-alegar sang suspek nga perwisyo si Villegas sa ila lugar bangod ini ang nagapalupok sang armas kag nagamaoy; apang suno sa iya, mabuot man ini kun wala nakainom.
Ginpahayag ni Rico nga iya ginhimo ang krimen bangod kun indi ini niya pagapatyon, possible siya ang unahon tumba ni Villegas.
Gin-ako naman sang suspek nga iya man ginlabo sang tinalikdan nga Mayo si Villegas apang sila ang nag-settle sa barangay.
Wala naman ini naghinulsol sa ginbuhat nga krimen kag iya na ginatugyan sa pamilya sang biktima kun siya ang pagapasakaan sang kaso.