PROVINCIAL CAPITOL – Nagpadala sang dugang nga mga heavy equipment ang Provincial Government sang Negros Occidental agud mapadasig ang paghawan sang nagsupot nga lahar sediments sa Ibid Creek sa Sitio Tamburong, Barangay Biaknabato, La Castellana.
Ginpahayag ni Governor Bong Lacson nga ginmanduan sini ang Provincial Engineer’s Office nga ipadala ang mga heavy equipment nga sarang makabulig agud mapadasig ang clearing operations.
Nakalab-ot naman sa gobernador ang pagluntad sang baha sa mga pamalay lapit sa sapa sang Domingo kag nagpahayag nga dugang ini nga lahar gikan sa Bulkan Kanlaon nga kinahanglan liwat nga kuhaon.
Ginpabutyag sang gobernador nga nakita sini mismo ang sitwasyon sang sapa kun sa diin nagtipon ang lahar nga ginbuga sang bulkan kag aminado ini nga madugayan antes matapos ang clearing operation.
Nagalaum naman si Lacson nga aprubahan sang Department of Environment and Natural Resources ang hingyo sini nga tugutan ang commercial clearing sa creek kun sa diin ang mga pribado nga kompaniya amo ang magahakot sang lahar sediments kag magabayad pa sila sa Provincial Government.
Ang resolution ang una nga paaprubahan sa Protected Area Management Board en banc meeting nga hiwaton sa Capitolio sa Setyembre 25.