PROVINCIAL CAPITOL – Ginpasakaan sang kaso nga grave abuse of discretion kag betrayal of public trust sa Office of the Ombudsman si anay DPWH Region 6 Director Nerie Bueno bangud sang pagpa-demolish sang Talave Bridge, nga nagaangot sang banwa sang Calatrava kag ciudad sang San Carlos.
Ang kaso ang ginpasaka ni Andoni Valencia, isa ka heritage advocate kag chairperson sang Juan Calatrava Movement, grupo nga nagaduso sang pag-presebar sang cultural kag historical landmarks sa northern Negros.
Base sa complaint, ang 100 metros kalaba nga Talave Bridge, nga gintukod sadtong 1933, ang makabig na nga Important Cultural Property (ICP) sandig sa Republic Act No. 10066 ukon ang National Cultural Heritage Act of 2009 bangud kapin 50-anyos na ini nga natukod.
Sa idalom sang layi, hugot nga ginadumilian ang pagbag-o kag pagpaguba sang heritage structures nga wala sang clearance nagikan sa National Historial Commission of the Philippines (NHCP).
Apang sa pihak sini, ginpaguba ang amo nga taytay sadtong 2023 nga wala sang nagakaigo nga clearance.
Sadtong July 2024, ang NHCP ang nag-issue sang Cease and Desist Order kay Bueno kag San Carlos City Mayor Renato Gustilo apang nagpadayon ang demolisyon sang taytay.
“This is a clear violation of the law,” suno kay Valencia. “The NHCP’s authority was ignored, and a piece of our national heritage was destroyed without due process. This is not just negligence—it is a betrayal of public trust.”
Ginhatagan sini sang pagtamod nga indi lamang mapuslanon nga estruktura kundi simbolo man sang pre-war engineering kag economic history sang rehiyon ang Talave Bridge.
Nahibaluan nga ang amo nga taytay ang gintukod sang United States Steel Products Company kag may daku nga papel sa pag-transport sang tubo sadtong American colonial period.
Ginaduso man sa reklamo nga imbestigahan sang Ombudsman ang mga tikang ni Bueno kag iban pa nga opisyales nga imbolbado kag manabat ang mga ini sa administrative kag criminal nga aspeto bangud sa pagbayolar sang RA 10066
Ginapanawagan man sang grupo ni Valencia ang pagbalik sang Talave Bridge sa orihinal sini nga porma kag ang mas makusog nga pagpatuman sang heritage protection laws sa bug-os nga pungsod.*Andoni Valencia photos