Ginpahamtang sang National Grid Corporation of the Philippines (NGCP) ang grid sang Visayas sa idalom sang Yellow Alert status, nga magasugod umpisa la una sini nga hapon tubtob las dose sa tungang gab-i, subong nga adlaw, Oktubre 1, 2025.
Mga las 8 sini nga aga, ang available nga kapasidad para sa grid sang Visayas amo ang 1,888 MW, samtang ang ginapaabot nga peak demand amo ang 1,839 MW.
Ginreport sang NGCP nga 27 ka power plants ang sa karon naka-forced outage tungod sa bag-o lang natabo nga 6.9 magnitude nga linog. Dugang pa, 16 ka iban pa nga planta ang daan na nga indi available antes pa sang insidente, kag isa ka planta ang naga-operate sa derated nga kapasidad. Nagalab-ot ini sa kabug-usan nga 1,654.7 MW nga indi available sa grid.
Ang nagapanguna nga rason ngaa ginpaidalom sa Yellow Alert amo ang pag-trip sang 27 ka power plants bangod sa linog, nga nagresulta sa pagkadula sang 1,444.1 MW halin sa grid.
Sa pihak nga bahin, ang mga grid sang Luzon kag Mindanao sa karon yara sa normal nga kondisyon.