RMN EXCLUSIVE
PROVINCIAL CAPITOL – Indi safe nga tineran sang mga pasyente ang tatlo ka panalgan sang Cadiz District Hospital bangud sang mga damage nga gintuga sang mabaskog nga pagtay-og, Martes sang gab-i.
Sa exclusive interview sang DYHB, ginpahayag ni Provincial Engineer Ernie Mapa nga wala sila naghatag sang clearance sa pagbalik sang mga pasyente sa 3rd, 4th kag 5th floors sang CDH.
Sa ginpatigayon nga damage assessment sang PEO upod kay Provincial Health Officer Dr. Girlie Pinongan, nakit-an nga may nagkalabuka nga kristal kag nagkalaguba nga bintana nga delikado para sa mga pasyente.
Suno kay Engr. Mapa, ila igarekomendar nga pailisan ang bilog nga mga bintana sang tatlo ka floors sang Cadiz District Hospital lakip na ang frame kag glass sini.
Apang iya ginklaro nga structurally safe ang CDH sa pangkabug-usan.
Sa karon, indi pa mahambal sang provincial engineer kun san-o makabalik ang mga pasyente sa apektado nga mga panalgan sang hospital.
Sa separado nga interview, ginpahayag ni Cadiz City Mayor Bading Escalante nga temporaryo nga magatiner ang apektado nga mga pasyente sa COVID Ward sa sulod man mismo sang CDH compound.*Photos by CDRRM and CDH/Facebook