Posible nga madugayan pa antes liwat nga magamit ang tatlo ka panalgan sang Cadiz District Hospital nga nakitaan sang pila ka mga damage kasunod sang mabaskog nga linog sadtong Martes sang gab-i. Ginpahayag ni Provincial Health Officer Dr. Girlie Pinongan nga may nakit-an nga nagkalabuka nga kristal sang bintana kag mga cracks sa dingding sang 3rd tubtob 5th Floors sang ospital kag delikado ini para sa mga pasyente. Aminado si Dr. Pinongan nga possible madugayan antes liwat nga magamit ang nasambit nga mga panalgan bangud ipakaayo anay ini. Una na nga ginpahayag ni Provincial Engr. Ernie Mapa nga ila ginrekomendar nga ipakay-o ang kabug-usan sang mga bintana, lakip na ang frame kag kristal, sa apektado nga mga floors. Nahibaluan nga sang nagluntad ang linog, ginpapanaog ang 113 tanan ka mga pasyente sang Cadiz District Hospital kun sa diin ginabanta katunga sini, nga ginalakipan sang mga pasyente sa paediatrics kag adults, ang temporary nga ginsaylo sa COVID Facility.
