PROVINCIAL CAPITOL – Dugang nga tatlo ka mga district engineers sa Negros Occidental ang gindagdagan sang National Bureau of Investigation (NBI) sang subpoena may angot sa imbestigasyon sa mga flood control projects.
Ginkumpirmar ni NBI Bacolod Executive Officer William De Arca nga napa-receive na sang nagligad nga semana ang subpoena sa mga district engineers sang Bacolod Lone District Engineering Office, First District Engineering Office sa Talisay City kag Second District Engineering Office sa Bago City.
Sa madason nga semana, ginalauman nga sila ang personal nga magakadto sa NBI-Bacolod Office agud magpasa sang mga dokumento nga ginahingyo sang ahensiya.
Nahibaluan nga nag-issue ang NBI sang subpoena sa mga district engineers agud magkooperar ang mga ini sa imbestigasyon.
Una na nga gindagdagan sang subpoena ang district engineers sang Third District Engineering Office sa Binalbagan, Fourth District Engineering Office sa Kabankalan City kag Fifth District Engineering Office sa San Carlos City.
Suno kay De Arca, sang nagligad nga semana nagpadulong ang mga ini sa ila opisina agud magpasa sang mga dokumento agud ikumparar sa mga dokumento nga makit-an sa website sang DPWH.
Sunod naman nga magapatigayon sang ocular inspection sa mga flood control projects ang NBI.