PROVINCIAL CAPITOL – Kumpiyansa si Negros Occidental Governor Eugenio Jose Lacson nga madayon ang pagpatukod sang Panay-Negros-Guimaras Bridges sa pihak sang pag-hold sang pungsod South Korea sang mga loans para sa Pilipinas.
Ginpahayag sang gobernador nga wala ini sang may nabaton nga opisyal nga komunikasyon gikan sa National Government nga nagasuspendir ukon naga-hold sang pagpatuman sang proyekto.
Nahibaluan nga ginmandu ni South Korean President Lee Jae-myung ang suspension sang proposed P700 billion loan para sa bridge-building projects sa Pilipinas bangud sang isyu sang kurapsyon apang ginpanginwala sang gobyerno nga may loan agreements.
Samtang, ginpahayag ni Gov. Lacson nga ang pamangkot sa karon amo nga kun san-o masuguran ang pagtukod sang mga taytay nga magaangot sang tatlo ka dalagku nga isla sa Visayas kag nagpabutyag nga possible sa tuig 2028 pa ini mapatuman.