Nagapangayo sang pasensya ang Meta matapos magkaproblema ang pila ka mga social media platforms kagab-i, Marso 5.
Apektado sa nasiling nga outage ang Facebook, Messenger, Threads kag Instagram diin ginpahayag sang pila ka mga users nga na-automatic log-out lang sila kagab-i.
Naglawig sang malapit sa duha ka oras ang amo nga outage kag amat-amat nga nagbalik ang access sang mga users las 12:30 sang kaagahon, March 6.
Madamo man sang mga users worldwide ang nag-report sang kaangay nga problema sa pag-usar sang mga applications sang Meta kag nagkabalaka nga basi na-hack ang ila mga account.
Sa post sa X (sadto Twitter), ginpahayag ni Meta communications director Andy Stone nga ila na-address ang amo nga technical issue.
“Earlier today, a technical issue caused people to have difficulty accessing some of our services,” pahayag ni Stone.
“We resolved the issue as quickly as possible for everyone who was impacted, and we apologize for any inconvenience.”
