Ginpalab-ot sa DYHB News Team ang ginaangkon nga kahangawa kag kakugmat sang nagapakilala grupo sang Moro National Liberation Front (MNLF) sa Cadiz Heights, Barangay Tiglawigan, Cadiz City.
Ginakwestyon sang pomoloyo ang ila pagpatindog sang mosque kag headquarters nga wala sang pahanugot sa homeowners sang subdivision.
Ang mga residente sa mga gina-alegar recruits tungod kalabanan sa mga ini nagasuksok sang military fatigue uniform, nga ginadumili ang pagsusok sini kun indi miembro sang AFP.
Kalabanan nagakatabu ang pagdamu sang pagtilipon sa ti-on sang kagab-ihon suno sa mga homeowners.
Gin-ako naman ni Brgy. Tinampaan Punong Barangay kag ABC president sang Cadiz City, Vicente Villacin nga ginapang-iyahan sang iya tiyo nga si Bergan Villacin ang apat ka ektariya nga duta nga gina-ukopar sang nagpakilala nga MNLF group samtang ang duha naman ang gina-ukopar sang PGBI.
Suno sa kay City Councilor Villacin nga ang duta nagkaproblema sa bangko nga PBCOM gani napabay-an na ini.
Dugang pa ni Councilor Villacin nga sang ila ginpamangkot ang amo nga grupo kun sin-o naghatag sang pahanugot sa ila, ila gintudlo si Annie Batusbatusan nga indi naman kilala sang konsehal.
Aminado man si Villacin nga bisan siya nagakahangawa bangud naga-amat amat damu na ang ila mga recruits.
Suno pa kay Villacin una nga nagpatindog sang ila mosque sa Siwahon sa syudad sang Sagay apang ginpahalin man sila sang mga residente tungod ginhadlokan man ang pumoloyo sa ila nga nagapakilala nga mga MNLF member.
Nakibot nalang si Villacin nga sa Cadiz naman sila nagsaylo. Yara na karun sa 30 porciento ang structure nga ila ginapatindog apang ginpauntat ini sang syudad tungod bisan isa, wala ini sang nagakaigo nga papeles.
Nagbutang na sang police personnel ang Cadiz LGU agud mamonitor ang giho sang nagpakilala nga MNLF Group.
Ginhangyo naman ni Villacin ang kooperasyon sang pumoloyo agud mahibalo-an ang katuyoan sang sini nga grupo. Gin-activate man ang tanod sang barangay agud magbantay upod sa kapulisan.
Sa bahin naman sang Cadiz City Police Station, ginpasiguro naman ni PLt. Gina Fernandez nga monitored ang tanan nga aktibidades sang grupo gani wala sang ikahangawa ang homeowners sang Cadiz Heights.
Indi pa karun makapaguwa sang ila official statement ang Cadiz PNP bangud wala pa sang clearance sa alkalde sang Cadiz nga si Mayor Salvador Escalante Jr.
Sa karun nauntat ang construction sang mosque bangud ginkadtoan na ini sang City Engineer’s Office sang amo nga syudad.
Wala pa sang confirmation kun bala ang ara sa barangay mga katapo gid man sang MNLF.
