Indi pa karon makasiling ang City Disaster Risk Reduction and Management Office sang ciudad sang Himamaylan kun makadeklarar na sila sang state of calamity sa tunga sang mga kahalitan nga dala sang El Niño phenomenon sa ila mga pananom.
Ginpahayag ni Joefil Sombilon, ang head sang Research and Planning Section sang Himamaylan CDRRMO, nga nagapadayon pa ang ila nga rapid damage assessment and needs analysis sa apektado nga mga lugar.
Magapungkuanay ang CDRRMO kag dira lantawon kun kinahanglan na ang deklarasyon sang state of calamity. Nahibaluan nga base sa pinakaulihi nga report, nagdangat na sa 11 ka mga barangay ang may potable water shortage nga nagaapekto sa kapin 20,000 katawo samtang yara naman sa kapin P12 million ang kahalitan sa ila nga agrikultura.
Base sa guidelines sang NDRRMC, kinahanglan nga maglab-ot sa 15 percent sang populasyon kag 30 percent sang palangabuhian sang isa ka banwa ukon ciudad ang maapektuhan antes maka deklarar sang state of calamity.
