Sa imbestigasyon sang Bureau of Fire Protection-Bacolod nahibaluan nga electrical in nature ang kabangdanan sang sunog nga nagluntad sa isa ka balay sa Charito Heights Subdivision, Brgy. Granada ciudad sang Bacolod kapin las-9:31 sang aga, Marso 25.
Base sa interview sang DYHB kay Fire Chief Inspector Stephen Jardeleza, Fire Marshal sang BFP- Bacolod, nga ang partially damaged nga balay, kag ginkabig nga totally damaged nga van kag motorsiklo ang naga-park sa garahe nga gina panag-iyahan ni Marla P. Lumanog.
Nahibaluan nga electrical in nature ang rason sa nagluntad nga sunog bangod naghimo sang temporaryo nga linya sang kuryente ang amo nga tagbalay gikan sa ila sulod padulong sa ila garahe, kun sa diin gin agi ang amo nga linya sang kuryente sa ila bintana nga human sa jalousie kun sa diin naipit ini kag nagka short circuit kag amo ang pagluntad sang sunog.
Nagdangat sa kapin P700,000 ang balor nga ginbilin nga kahalitan sang sunog. Wala naman sang may nasamaran sa amo nga insidente.
