Ginpasiguro ni Mayor Nicholas Yulo nga wala sang kakulang sa suplay sang tubig sa ciudad sang Bago.
Suno sa alkalde, sa pihak nga wala nagalab-ot ang tubig sa mga ‘end canals’ ukon mga kanal nga yara na sa ubos, wala naman sang pagnubo sa water supply sa bahin sang mga irigasyon, base sa report sang Bago River Irrigation System (BRIS).
Sa bahin naman sang tubig-ilimnon, paathag ni Mayor Yulo, may makuhaan sang tubig apang ang problema yara sa distribution ilabi na subong nga yara pa sa transition period ang Bago City Water District kag joint venture partner sini nga PrimeWater.
Nahibaluan nga may pila ka lugar sa ciudad sang Bago nga indi 24 oras ang pagtubod sang tubig. Apang paathag ni Mayor Yulo, ginailisan ang mga linya sang tubig nga kapin 30 katuig na ang kadugayon samtang ang Primewater nagdugang man sang water source bangud sang ginalantaw nga pagtaas sang demand sa tubig sa tunga sang pagdaku sang populasyon sa ciudad.
