Wala pa nakilala sa gihapon ang nasapwan nga bangkay sang lalaki sa Banaba Street, Villa Angela Subd. Brgy. Villamonte mga las-7:30 sang aga sang Huwebes Santo, Marso 28.
Base sa rekord sang Bacolod Police Station 4, natalupangdan sang isa ka construction worker sa amo nga lugar samtang ini nagapaligo nga may naga-alisngaw nga baho nga nagahalin sa kahilamonan.
Ginpadulungan ini sang construction worker kag didto na diskubrihan ang persona nga wala na sang kabuhi, kag ginabulubanta yara sa 40 tubtob 50 ang pang-edaron.
Ginapatihan nga isa ka homeless ang nasapwan bangod siya ang nagatinir lamang sa amo nga lugar.
Ginabulubanta tatlo na ka adlaw na napatay ang amo nga persona antes nadiskubrihan.
Ginlubong na lamang sa gilayon ang nasapwan sa Handumanan Public Cemetery, kag wala naman sang may nakita nga foul play sa iya kamatayon.
