Nagaplano si Negros Occidental 5th District Congressman Atty. Dino Yulo nga personal nga magpadulong sa talatapan sang Bureau of Soils and Water Management (BSWM) sa Metro Manila sa madason nga semana.
Sa DYHB Eksperto Legal Program, kun sa diin isa ini sa mga resident lawyers, ginpahayag ni Yulo nga plano niya nga ipakita ang mga litrato sang kahawaan sa southern Negros Occidental, particular sa Quinto Distrito, kun sa diin makit-an ang madamol nga gal-um ukon rain clouds sang tinalikan nga inadlaw. Luyag niya nga kuhaan sang paathag ang BSWM sa nangin una nga pahayag sang ahensiya nga wala sang “seedable clouds” ukon panganod sa kahawaan sang probinsiya rason indi sarang makapatigayon sang cloudseeding operations.
Nahibaluan nga pila ka bulan na nga ginapanawagan sang mga mangunguma kag sugar planters ang cloudseeding operations kasunod sang malawig nga panahon nga wala sang ulan dala sang El Niño phenomenon.
Base sa report sang Office of the Provincial Agriculturist of March 20, 2024, nagdangat na sa P90.6 million ang kahalitan sa agrikultura sa probinsiya particular sa humay kag mais kag wala pa nalakip diri ang sa bahin sang mga tubo.
