Nangin matawhay ang pagbantay sang Philippine Coastguard- Northern Negros sa tagsa ka area of responsibility kaangay sang BREDCO, Brgy. Banago ciudad sang Bacolod, Victorias City, kag Escalante City sa pagpatigayon sang heightened alert sa Semana Santa sumugod Marso 22 tubtob sini nga adlaw Abril 2.
Sa interview sang DYHB kay Commander Paterno Belarmino, sumugod sang Marso 22 kag sini nga adlaw sang Martes, Abril 2, nakarekord sang 52,666 outbound nga pasahero kag 51, 346 sa inbound nga pasahero sa mga pwerto.
Nagpatigayon man ang Coast Guard sang series of inspections sa tagsa ka mga pwerto, resorts, kag sea vessels. Ila man ginpasalamatan nga nangin cooperative ang mga pasahero.
Dugang pa ni Commander Belarmino nga sila ang nakarekord sang drowning incident sa ciudad sang Cadiz sang tinalikdan nga Biyernes, Marso 29 kung sa diin nasapwan nga nagalutaw-lutaw ang isa ka manug pangisda nga wala na sang kabuhi.
Apang sa kabug-usan nga assessment sang Commander nangin malinong kag matawhay ang pag-obserbar sang Semana Santa sa bahin sang Coastguard- Northern Negros.
