Kumpirmado nga pertussis ukon whooping cough ang nagtapik sa two-month old nga lapsag nga na-confine sa regional hospital sa Bacolod City.
Ini ang ginpahayag ni Governor Bong Lacson matapos nga naguwa na ang resulta sang confirmatory test gikan sa Research Institute for Tropical Medicine (RITM) sa babayi nga lapsag nga pumuluyo sang isa ka lugar sa probinsiya.
Sa karon, nakaguwa na sa ospital ang pasyente kag yara na sa maayo nga kahimtangan. Ginpahayag nga may nagainubo man sa sulod sang balay sang lapsag.
Magluwas sini, may anom ka dugang nga suspected cases nga ginpadala man ang swab sa RITM sa Manila. Isa sa mga ini ang naga-edad sang 11-anyos.
Nahibaluan nga kapin tatlo ka semana ang hulaton antes maguwa ang resulta. Angot sini, nagapanugyan ang gobernador sa publiko nga magsuksok sang face mask ilabi na kun nagaubo agud indi makalaton.
