Nagsungka ang driver sang tricycle nga imbolbado sa aksidente nga nagluntad pasado las-4 sang kaagahon, Abril 2 sa atubang sang City Mall Goldenfield sa dalan Araneta.
Sa interview sang DYHB kay Police Major Eugene Tolentino, Station Commander sang Police Station 8, ang tricycle driver ginkilala nga si Dennis Ferrer, 40-anyos, Brgy. Tabuanan Bago City samtang ang driver sang motorsiklo amo si Ralphy Diosto Sr.
Base sa imbestigasyon sang kapulisan, gin-tingwaan ni Diosto nga mag-overtake sa tricycle apang nabungguan niya ang sidecar ni Ferrer kag gilayon nga natumba kag nagligid sa dalan. Maayo man nga kompleto sa gear si Diosto apang nakaagom ini sang minor injuries, kag gindala sa ospital.
Nagpalagyo pa ang tricycle driver matapos ang aksidente apang siya man ang nag surrender sa Bacolod Police Station 9 kag ginturn-over lamang sa Police Station 8.
Yara pa sa karun sa ospital ang biktima apang sa inisyal nga impormasyon sang kapulisan posible nga makig-settle ini sa suspetsado. Apang nahunong pa si Ferrer sa Police Station 8 sa nagakaigo nga reglementary period.
