Gin-aprobahan sang Israel ang pagbukas sang pila ka mga alagyan sa Gaza agod magpasulod sang bulig gikan sa iban nga pungsod kag organisasyon.
Ini matapos ang paghinun-anon ni US President Joe Biden kay Israel Prime Minister Benjamin Netanyahu, nga nagakadapat nga masolusyunan ang pagpangabudlay sang mga indibidwal sa Gaza nga wala sang may madalahig nga sibilyan, ilabi na sa kakulangan sang pagkaon kag kagamitan sa lugar.
Temporaryo nga magabukas ang Erez Gate sa Norte nga bahin sang Gaza kag ang Ashdod Port agod mapatigayon ang pagdul-ong sang humanitarian aid. Samtang ang bulig nagikan sa Jordan ang ginpahanugutan nga maga-agi sa Kerem Shalom Crossing.
Ginapatihan nga ini ang gin-abrobahan sang Israel bangod sa pagpamahog sang Estados Unidos nga kun luyag nila nga magapabilin ang suporta sa pungsod, sila ang magapahanugot sa ini nga tikang.
Una na nga ginsiling ni US Secretary of State Anthony Blinken, nga may patigayunon nga pagbag-o sa mga polisiya sang US natuhoy sa giyera sa tunga sang Israel kag Hamas kun wala sang may makita nga pagbag-o sa Israel.
