Ginareklamo sang pila ka mga pumuluyo sang Medel Roadside Subdivision sa bahin sang Purok Matahum Barangay Tangub ciudad sang Bacolod ang pag-limita sa ila nga pag-agi sa gate sang isa ka pribado nga properidad.
Base sa ekslusibo nga interview sang DYHB kay Jessie Panaligan, residente kag gina-saligan sang tag-iya sang amo nga lugar, nga ang pagtumod sang area nga sakop sang subdivision ang pending pa sa korte.
Ini bangud may 2.8 hectares nga gina-claim ni Engr. Danny Jolipa nga siya ang nagapanag-iya. Ginkasuhan man sini sang ejectment ukon land grabbing ang 30 ka mga residente bangud sa pagpuyo nila sa lugar.
Ginapakigbato sa karun sang mga pumuluyo ang ila nga kinamatarong sa properidad apang sila ang may kabudlayan sa pag-access sa lugar bangod ini ang ginkudalan kag sila ang gin-limitahan sa pag-agi sang gate.
Nahibaluan nga may oras lamang nga gin hatag ang claimant sa pag-agi sa gate, kun sa diin accessible ini siya las-7 sang aga tubtob las-9 sang gab-i, kag bantay sarado pa ini sang mga gwardiya.
Ginadumilian man ang pumuluyo nga pagpasulod sang ila nga vehicle kag pagbaton sang bisita.
May pila ka mga pumuluyo nga gina pili na lamang mag-agi sa pader agod makagwa sa kudal kag makapadulong sa ila kadtuan sa anuman nga oras.
Panawagan sang pumuluyo nga hatagan sila sang kahilwayan nga ma-access ang gate sa wala gina pili nga oras kag sila ang paga-tratahon sang ensakto.
