Patay ang driver sang motorsiklo matapos nga nakabunggo sa naga-park nga truck sa National Road sa bahin sang Purok Santol, Brgy. Lopez Jaena banwa sang Murcia, kaina las-3:50 sang kaagahon adlaw sang Domingo, Abril 7.

Base sa rekord sang Murcia Municipal Police Station, ang driver sang motorsiklo nga Rusi 125cc amo si Frankly Ellaga, 56-anyos, kag residente sang Prk. Mainuswagon, Brgy. Canlandog sa amo nga banwa.

Samtang ang driver sang Isuzu Cargo Truck ginkilala kay Gerryl Ponce, 52-anyos, residente sang Brgy. Igmaya-an, Don Salvador Benidecto.

Sa inisyal nga imbestigasyon sang kapulisan kag base sa panaysayon sang saksi sa amo nga insidente nga si Ramel Dumalay, nga nagamaneho si Ellaga sa direksyon nagikan sa banwa padulong Brgy. Canlandog, kag sa iya pag-abot sa lugar kun sa diin nagluntad ang aksidete hinali ini nagpadulong sa pihak nga bahin sang dalan kun sa diin ini siya ang nakabunggo sa likod sang naga-park nga truck.

Nakaagom sang pilas sa ulo si Ellaga kag gilayon gindala sa Murcia Rural Health apang gindeklarar nga dead on arrival.

Yara sa karun si Ponce sa kustodiya sang kapulisan para sa dugang nga imbestigasyon kag proper disposition.