Gin-rescue sang mag-asawa ang 11-anyos nga babayi nga nagpalagyo sa gina-alegar pagpangastigo sang iya iloy kag mga tiyo sadtong Abril 5, Biyernes nga adlaw sa ciudad sang Talisay.
Base sa interview sang DYHB kay Maricar Tomayao, nga naka-rescue sa bata, las-3 sang kaagahon sa amo nga adlaw yara ini siya sa iya pwesto nga magapanira na kuntani, apang hinali lang may nagpalapit nga bata nga nagapangayo sang tubig.
Sang nakita sang mag-asawa ang bata, ila ginkakibot ang sitwasyon sini, bangod puno ini sang pilas sa lawas, bugbog sarado, kag halos indi na makalakat sa husto.
Gilayon nila nga ginpamangkot ang biktima nga kun sin-o ang kabangdanan sa pagpanakit sa iya bangod indi ini nila kilala sa lugar, kag iya ginsabat nga ini ang ginhimo sang iya iloy kag mga tiyo.
Nahibaluan nga antes pa man makapalagyo ang bata, duha na ini ka adlaw nga yara sa poso-negro sang baboy nga may kadalumon nga kapin 5 feet nga tabon sang sin kag sa ibabaw gintutdan ini sang nobya sang iya tiyo.
Gintingwaan sang bata nga makapalagyo bangod indi na ini kaagwanta sa halos lima na katuig nga pagpanakit sa iya.
Sa pagtsekyar sang mag-asawa sa bata kag sa pagpangusisa nila sa iya, nahibaluan nga siya ang gina-martilyo sa dughan kag tiil, ginahampak sang pala sa likod, kag ginpakagat sa pitbull nga ido.
Gindala sa gilayon sang mag-asawa ang bata sa ila puluy-an agod mahatagan sang pagkaon kag panapton.
Nagpadulong ang mag-asawa sa Talisay Police Station agod ireport ang amo nga insidente kag didto nadakpan sa lugar ang iloy, duha sini ka tiyo, kag ang mega sa iya tiyo.
Samtang ang bata ang gindala sa ospital agod madapatan sang pagbulong.
Nahunong na sa karun ang amo nga suspetsado sa Talisay Police Station.
Disclaimer: Ginpalayag ini nga balita para ipabalo nga nagakatabo ang kaangay nga insidente, APANG, ginapaalinton nga ang ginhimo sang mga natungdan batuk sa bata ang INDI gid nagakadapat kag INDI dapat pamarisan.
