Ginpasiguro sang City Social Welfare and Development Office (CSWDO) sang Talisay nga buligan nila ang 11 anyos nga babayi nga makarecover sa trauma sa pagpangkastigo sang iya iloy kag duha ka tiyo.
Sa interview sang DYHB kay Dionela Madrona, Head sang Talisay CSWDO, ginsiling sini nga yara na sa karon sa kustodiya sang ahensya ang menor de edad nga babayi kag ginaatipan na.
Dugang pa ni Madrona, matapos nga nahibalu-an ang pagpangkastigo sa bata gilayon nila ini nga ginkuha kag ginhatagan sang mga nagakaigo nga assistance sa City Health Office.
Nakaadmit sa karon ang bata sa isa ka hospital agod mabulong, kag ginasiguro nga mabuligan ini tubtub makarecover man sa trauma.
Priso na man sa karon ang mga suspetsado nga nagpangkastigo sa biktima.
