Nagapamiligro karon ang 24,759 ka mga registered voters diri sa ciudad sang Bacolod bangud kay posible makakas ang mga pangalan sini sa Commission on Elections (COMELEC) nga listahan sa idalom sang ‘active voters.’
Sa interview sang DYHB kay COMELEC-Bacolod Election Officer Atty. Katrina Trinio Caña, iya ginpahayag nga ang ini nga mga tawo ang napaslawan mag botar sa duha ka sunod-sunod nga eleksyon.
Sini nga Abril 15, paga-aktuhan na sang Election Registration Board (ERB) ang nasiling nga inactive registered voters.
Suno kay Atty. Caña, padal-an sang notice ang ini nga mga tawo nga deactivated na ang ila nga voter’s record agudto maka file man sila gilayon sang reactivation sa opisina sang COMELEC.
Kaangay lang sa pagparehistro ang proseso agud ma-reactivate ang voter’s record diin may form lang nga fill-upan ang botante kag dapat personal gid nga magpadulong sa COMLEC Office.
Halin sang pag umpisa sang voters registration nakaligad nga Pebrero yara na sa 6,000 ang new registrant, 600 ang nagpadulong agud magpa reactivate kag 3,000 naman ang nagtransfer sang ila registration.
