Gina engganyo sang City Health Office (CHO) ang mga ginikanan nga mag-participate gid sa mga immunization activity sang mga Local Government Unit (LGU) kag Department of Health (DOH) agud mapalayo sa mga balatian ang ila mga kabataan.
Sa interview sang DYHB, ginpahayag ni Dr. Grace Tan, pamuno sang Environmental Sanitation Division sang CHO, nga dapat makumpleto gid ang primary vaccine sang mga kabataan antis ang mga ini magtung-tong sa duha ka tuig.
Tion nga makumpleto na ang primary vaccine kaangay sang Diphtheria-Tetanus-Pertussis ukon DTP vaccine, pwede lang makapa booster shot ang mga kabataan, duha ka tuig pasaka.
Sa pihak nga bahin, under monitoring sa gihapon ang tatlo ka mga lunsay duha ka bulan nga mga lapsag nga nagpositibo sa pertusssis ukon whooping cough bisan pa na discharge na ang mga ini sa ospital.
Bisan pa palareho lang nga nakakuha sang 1st dose sang DTP vaccine ang tatlo, nadutalan ang mga ini sa gihapon sang ubo bangud kay nagabarukoy man ang mga tawo sa palibot sini.
Panugyan pa sang CHO sa publiko nga magsuksok gid sang facemask kon naga ubo kag ukon magtinir nalang gid sa sulod balay kon nagalain ang pamatyag.
