Nakapasa na sang incident report ang Bacolod Department of Education (DepEd) Division Office sa Regional Office natuhoy sa gina-alegar pagpanghimulos sang isa ka maestro sa estudyante.
Base sa interview sang DYHB kay Atty. Jubert Katalbas, legal officer sang Division office nga Marso 25 sini nga tuig nga sila ang nagpatawag sang pamilya ka biktima, school principal, kag guidance counselor sang amo nga buluthuan.
Sadtong Marso 26, gilayon nga ginpasa sang division office ang incident report sa opisina sang region.
Suno kay Atty. Katalbas, base sa child protection policy sang DepEd, una nga tikang nga ginahimo kung may yara sang kaangay sini nga insidente, sila ang nagapatigayon sang preventive measure kung sa diin ila ginakuha ang respondent sa buluthuan kun sa diin ini na assign agod mahatagan sang safe space ang biktima.
Sa karun ang maestro nga gina-alegar imbolbado sa pagpanghimulos ang yara sa status nga floating kun sa diin yara ini naga-duty sa division office.
Natuhoy sa luyag nga ipasaka nga kaso administratibo, pwede makafile sang motu proprio ukon maka-file independently ang region office sa suspetsado base sa imbestigasyon nga patigayunon.
Dugang pa ni Atty. Katalbas, ang kaangay sang insidente nga sexual assault pwede na ibalik sa division para sa dugang nga imbestigasyon kag kung mapamatud-an nga guilty ang akusado kah nakadepende sa iga-recommend sang committee kung ano nga penalidad ang igapatuman.
Pero sa kaangay sini nga sitwasyon ukon report nga gin-sumiter, posible nga i dismiss ang maestro sa serbisyo.
Apang sa panindugan sang division office, natuhoy sa alegasyon sang tig-reklamo nga sila ang ginpasa-pasahan sa pagfile sang administratibe case, suno kay Atty. Katalbas wala nila ginpasa-pasahan ang himata sang estudyante matapos nga mabaton ang reklamo batok sa maestro. Bangod ila ginahatagan sang importansiya ang kaangay sini nga insidente ukon report.
Sa bahin sang mga report nahutoy sang child abuse sa ciudad dutay lamang ang kaangay sini nga kaso suno kay Atty. Katalbas, apang indi malikawan nga matabo ini. | TVDS photo
