Ginahulat nalang sa karon sang Department of Education-Division of Bacolod City ang kopya sang motu proprio complaint ni Dep-Ed Regional Director, Dr. Ramir Uytico naangut sa kaso sang ginaalegar pagpanghimulos sang isa ka maestro diri sa ciudad sa iya 15 anyos nga estudyante.
Sa interview sang DYHB kay Atty. Jubert Katalbas, Legal officer DepEd Bacolod Division, iya ginpahayag nga indi na kinahanglan pa mag file sang estudyante sang pormal nga reklamo kontra sa maestro bangud kay si RD na ang maga-ubra sini, base man sa ila DepEd Child Protection Policy.
Sandig sa pagsulundan sang DepEd, ang disciplining authority sa bahin sang teaching personnel ang yara sa Regional Director samtang ang mga ginareklamo naman nga non-teaching personnel ang yara sa idalom sang disciplining authority sang division superintendent.
Paathag ni Katalbas nga ang ini tanan ang sa bahin pa lang sang Administrative case kontra sa maestro.
Tion mag-abot na ang kopya sang motoproprio complaint nagikan sa Regional Office, gilayon sila nga magatukod sang investigation Committee nga pagabug-usan sang Division superintendent/legal officer bilang chair sang komitiba, Miyembro sang DepEd teacher’s organization kag isa ka DepEd Supervisor.
Diri maga-issue ang committee sang notice sa ginareklamo nga magfile sang counter affidavit. Kag kon maka-file na ini sang affidavit, igapadala ini balik sang komitiba kay RD kasubong man ang kaso nga ila ginarekomenda.
Tion mabaton na ni RD ang recommendation sang investigation committee, pwede na ini mag issue formal charge kontra sa maestro.
