Aminado si Provincial Election Supervisor Atty. Ian Lee Ananoria nga “below target” ukon dyutay lamang ang mga nagapa-rehistro sa mga talatapan sang Commission on Elections sa bilog nga Negros Occidental.
Suno kay Ananoria, may mga election officers ini nga nagapatigayon pa sang satellite registration sa mga kabaranggayan agud madugangan ang mga nagapa-rehistro lakip na ang nagapa-transfer sang voter registration agud makabotar sa 2025 midterm elections.
Ginalantaw nga maganubo pa ang kadamuon sang registered voters matapos ang patigayunon nga Election Registration Board (ERB) Hearing sa maabot nga Abril 15, Lunes nga adlaw.
Nahibaluan nga sa ERB hearing ginapatigayon ang pag-aprubar sang application for voter registration kag subong man transfer lakip naman ang pag-deactivate sang mga wala nakabotar sang duha ka sunod nga election.
Apang suno kay Atty. Ananoria, magalagas sila sa second kag third quarter ERB hearings agud mapabilin ukon madugangan pa ang voting population sang probinsiya.
Sa karon, yara sa 52,655 ang nagpasakop sa voter registration sa Negros Occidental kun sa diin 14,714 sa mga ini ang nagpa-rehistro sa Bacolod City. Ang voter registration ang nagsugod sadtong Pebrero 12 kag magatakop sa Setyembre 30.
