Nasapwan patay ang isa ka mangunguma sa sulod sang ila puluy-an sa Sitio Antubayon, Brgy Laga-an sa banwa sang Calatrava, las-5 sang hapon adlaw sang Sabado, Abril 13.
Ang biktima ginkilala nga si Lito Sanapao, 54-anyos, kag residente sa amo nga lugar.
Base sa inisyal nga report sang Calatrava Municipal Police Station, pasado las-2 sang hapon sa amo nga adlaw, ang biktima kaupod sa iya nga pamilya ang nagpadulong sa isa birthday party sang ila himata.
Nahibaluan nga si Sanapao ang nag-una puli sa ila puluy-an agod magpahuway.
Pasado las-4 sang hapon, nakabati sang lupok ang asawa ka biktima nga si Merlinda Sanapao, apang wala ini niya ginsapak.
Makaligad ang isa ka oras, ang asawa ka biktima ang nagpauli kag nakita ang iya bana nga puno sang dugo samtang nagahamyangon.
Gilayon nga gindala ang biktima sa ospital apang gindeklarar nga dead on arrival, kag nadiskubrihan nga ini ang may igo sang bala sang wala pa mahibaluan nga sahi sang armas-luthang sa bahin sang iya ulo.
Padayon ang imbestigasyon sang kapulisan natuhoy sa motibo kag sino ang sa likod sang amo nga krimen.
š· Calatrava MPS
