Ginapa-review sa karon ni Bacolod Mayor Albee Benitez ang joint venture agreement (JVA) sa tunga sang Bacolod City Water District (Baciwa) kag PrimeWater.
Sa press conference ni Benitez subong nga adlaw, ginpahayag sang alkalde ang iya pagkadismaya sa performance sang PrimeWater bangud pila na ka tuig ang ila pag-operate sa Bacolod City, wala gid sang improvement ang water supply.
Paathag sang alkalde nga iya ginapa-review sang Baciwa Board ang kontrata sang Primewater bangud nga nakabutang diri nga sa ikaduha nga tuig sumguod sang JVA sang 2020, ang tanan nga consumers ang sarang maka-enjoy sang supply sang tubig nga uninterrupted sa sulod sang 24 oras.
Ginaquestion man ni Benitez ang investment sang Primewater kaaangay sang pag-install sang bag-o nga mga tubo nga amo naman ang rason sang water leaks subong man sang mahigko nga tubig.
Dismayado man si Mayor Albee bangud nga indi makita ang Primewater sa ginapatigayon sa karon nga water rationing project sang syudad sa diin mas aktibo pa gani diri ang private sector.
