Anay patyo sang mga indigenous people (Ips) ang lugar sa diin nasapwan ang tul-an sang tawo sa kilid sang Central Phil. State University (CPSU) gym sa Brgy. Camingawan, Kabankalan City, Negros Occidental.
Santo sa report sang Kabankalan City Police Station, nasapwan ang mga tul-an sang mga naga-obra sang septic tank sa kilid sang gym. Una ini nga nakit-an sang Abril 12, kag ginkuha pagkaaga kag gin-endorse sa Cultural Heritage Center/ Museum. Suno sa in charge sang museum nga si Dr. Jose Gay D. Gallego, Director of Historical and Cultural Heritage, patyo sang mga IPs ang lugar antes pa man natukod ang eskwelahan sang 1946.
Gindugang pa ni Dr. Gallego nga posible masobra isa ka siglo na ang tul-an. Suno naman kay Police Major Joelan Vinson, Deputy Chief of Police sang Kabankalan City Police Station, wala naangot sa ano man nga krimen ang nasapwan nga tul-an.
Dugang pa ni Vinson, magabulig ang CPSU sa pagpa-examine agod mahibaluan ang edad kag kon babayi ukon lalaki ang nasambit nga tul-an.
