xr:d:DAGBPYKe6Ps:30,j:6735556817579065714,t:24040205
KABANKALAN CITY – Ginrekomendar sang Kabankalan City Disaster Risk Reduction and Management Council ang pagdeklarar sang state of calamity sa tunga sang lapnagon nga kahalitan sang tig-ilinit sa nasambit nga ciudad.
Ginpahayag ni Mayor Benjie Miranda, ang rekomendasyon ang base sa record sang City Agriculture Office nga nagdangat na sa 41.1 percent sang mga mangunguma sa ila nga ciudad ang apektado sang malawig nga tig-ilinit kag ginalantaw nga posible madugangan pa gid ini.
Problema naman ang suplay sang tubig-ilimnon sa halos tanan nga kabaranggayan sang ciudad rason nga ang City Government nagapatigayon sang water rationing sa kada balay.
Apang suno sa alkalde, wala pa gin-aprubahan sang Sangguniang Panglungsod ang rekomendasyon bangud ini ang may ginapangayo pa nga legal opinion.
Ginpahayag naman ni Vice-Mayor Miguel Zayco nga nagpatawag sang special session sadtong Martes kun sa diin gintalakay ang rekomendasyon apang paathag sini, wala nila ini ginbasura kag sa baylo, ini ang ila gin-“lay on the table” samtang ginahulat ang paathag sang City Legal Office kun malakip sa mahatagan sang ayuda ang mga sugar farmers ukon obrero sa kampo.
Nahibaluan nga sa report sang Agriculture Office, kahalitan sa humay kag mais lamang ang nalakip apang wala masaad ang sa tanom nga tubo.
Pagklaro ni Zayco, luyag sang SP nga himuon ang deklarasyon sang state of calamity apang luyag lang nila maklaruhan ilabi na sa hiwaton nga regular session sini nga hapon.| Photo by Canva
