BACOLOD CITY – Nagpangayo pasensya ang pamuno sang Bacolod Traffic Authority Office (BTAO) angut sa iya gin-ako nga wala sini pagsunod sa insakto nga proseso sa paggamit sang isa ka salakyan sa idalom sang Mayor Albee Benitez Cab (MABCAB) program.
Sa interview sang DYHB kay BTAO chief Patrick Lacson, iya ginpahayag nga nagsulat na siya sang letter of apology kay Mayor Albee Benitez.
Ini kasunod sang order nga ginpa gwa ni City Administrator Lucille Gelvolea nga nagamando kay Lacson nga ibalik ang salakyan nga una na nakita sa gwa sang iya sini balay kag nakakas na ang sticker nga logo sang ciudad.
Suno kay Lacson, gilayon niya gin-uli ang salakyan sa Government Center pagkabaton sini sang order. Siya ang nakig-sugilanon man personal kay City Legal Officer Atty. Romeo Carlos Ting Jr. agud i-explain ang iya nga side.
Panindugan naman ni Lacson nga miscommunication lamang ang natabo.
Suno sa iya nag-ayo siya kay City Internal Auditor Rey Agpangan nga kon mahimo gamiton niya nalang bilang service vehicle ang isa ka unit sang MABCAB bangud kay sa 10 sini ka unit, lima lang ang ginagamit sang nga emplayado sang ciudad.
Apisar may yara na nga daan sang isa ka adventure nga salakyan nga na-detail kay Lacson, plano niya ini himuon nga patrol sang BTAO diin iya na gani napabutangan sang wang-wang kag handa na tani nga gamiton para sa ila nga operasyon.
Samtang ang isa naman ka unit sang MABCAB nga gin-ayo ni Lacson kay Agpangan ang iya tani tuyo gamiton sa pag monitor sa mga enforcers sini. Bangud kay kaangay lang sa taxi ang itsura sang MABCAB, indi ini dali-dali makilal-an sang mga enforcers kag aktwal niya gid nga makita ang mga nagakatabo sa dalanon.
Ini man ang iya rason kon ngaa ginkakas sini ang logo sticker sang ciudad sa nasiling nga unit.
Suno kay Lacson, sala lang sini kay naghaum siya nga madala lang sa sugilanon ang iya paggamit sang nasiling nga unit. Depensa pa sini nga wala siya sang malain nga tuyo sa iya pag-usar sang salakyan.
