Ang problema sa suplay sang kuryente kag masami nga pagluntad sang brownout nagapatimaan nga nagakinahanglan na sang dugang nga power generators.
Ini ang ginpahayag ni Governor Bong Lacson sa tunga sang pag-issue sang National Grid Corporation of the Philippines (NGCP) sang red kag yellow alert sa Visayas grid kag subong man ang masami nga unscheduled power interruptions sa tunga sang mataas nga pagkinahanglan sang suplay sang kuryente bangud sang tuman nga tig-ilinit.
Suno kay Lacson, paandam ini nga indi na kita makasalig sa naga-eksister nga power generators kag kinahanglan na sila nga madugangan.
Angot sini, ginapanawagan ni Lacson ang pagsulod sang dugang nga power generators sa probinsiya apang limitado lamang ini sa renewable energy.
Nahibaluan nga sa maabot nga Mayo, magahiwat ang probinsiya sang Power Summit kun sa diin hambalan ang amat-amat nga pagsaylo sa paggamit sang renewable energy.
