MANILA – Wala sang may nakita nga rason si Presidente Ferdinand Marcos Jr. para islan si Vice President Sara Duterte bilang Department of Education (DepEd) Secretary sa pihak sang issue sang bise presidente kag First Lady Liza Marcos.
Suno kay PBBM nga ang ini nga issue ang indi makaapekto sa ila working relationship ni VP Sara.
Pahayag pa sini nga sarang lamang islan ang mga Cabinet secretaries kon wala na sang mga ini gina-ubra ang ila obligasyon ukon mahibaluan nga korup ang mga ini.
Madumduman nga sa isa ka interview, ginpahayag ni FL Marcos nga nasakitan ini sa nangin reaksyon ni VP Sara matapos nga gin akusar ni anay Presidente Rodrigo Duterte nga naga usar droga si PBBM.
Sa isa naman ka video nga ginpagwa sang kampo ni VP Sara, ginpahayag sabg bise presidente nga kon ano man ang sentimento ni FL Marcos, wala ini sang labut sa iya mandato bilang ika duha nga highest official sang pungsod.
Ang ini nga butang suno kay VP Sara ang dapat gina istoryahan nalang sang pribado.
