HINOBA-AN-Nag-operate na ang ginareklamo nga giant fish cages sa Sitio Totong, Purok Sampaguita, Brgy. Talacagay, Hinoba-an apang ang mga fisher folks nawagangal nga wala sila ginpamatian sang barangay kag banwa.
Kahapon, ginpadulungan sang DYHB News Team ang lugar sa diin nahamtang ang giant fish cages sa nasakupan sang Pitogo Island. Madumduman nga sang Marso, ginreklamo na sa DYHB sang mga mangingisda ang operator sang fish cages nga isa ka negosyante bangud sang kahangawa nga maapektuhan ang ila pangabuhian. Sa interview sang DYHB sa isa ka mangingisda nga si Ritchie Fuentenegra, wala ginapamatian sang barangay kag municipal officials ang ila reklamo.
Ginbuy-an sa fish cages ang fingerlings sang bangrus kag dira ginabuburan sang feeds. Suno sa fisherfolks, bag-o pa lang naga-operate ang fish cages, apang mabaho kag makatol na ang tubig sa lugar kag nagakahangawa man ang mga ini sa mangin epekto sang feeds kag chemicals sa mga corals sa idalom.
Sang wala pa ang fish cages, makakuha ang mga mangingisda sang isda nga gurayan kag may mga nagapanalom man sa lugar. Masami man ini nga ginakadtuan sang mga divers.
