BACOLOD CITY – Ginmandu-an na ni Mayor Albee Benitez ang mga Barangay Kapitan sa ciudad sang Bacolod naangut sa pagregulate sa mga E-trike sa dalanon sa ginpatigayon nga consultative meeting kaina sang aga, Abril 24 sa Bacolod City Government Center Lobby.
Sa interview kay Benitez ginpahayag sini nga iya na ginmandu-an ang mga punong barangay nga mag ubra sang report sa kon pila ka mga units sang e-bike/ e-trike ang kinahanglan sang isa ka Barangay kag kasubong man ang ila iga-suggest nga taripa.
Paathag sang alkalde nga indi man nila luyag maapektuhan ang palangabuhian sang mga drivers apang luyag man sang ciudad ma-regulate ini agud malikawan ang pagpinagusto lang biyahe sa dalan.
Prioridad gid suno kay Benitez amo ang seguridad sang mga pasahero nga gasakay diri labi na nga kalabanan sa mga naga biyahe e-bike kag e-trike ang wala sang drivers license kag wala ma register ang mga unit sini sa ciudad.
Sa Mayo 15 naman ang deadline sa pag-submit sang mga kapitan sang report sa ginapangayo sang alkalde.
Pagkatapos sini, magaubra naman sang executive order si Benitez angut sa regulation sini.
Ang meeting kaina ang ginbuylugan man sang Land Tranportation Office (LTO) kag Bacolod City Traffice Authority Office (BTAO).
