Brutal ang nangin kamatayon sang isa ka babayi sa Purok Kawayanan, Barangay Rafaela Barrera sa ciudad sang Sagay matapos ini ginlabo sang iya mismo amay las 2:55 sang hapon, Abril 24.
Ang biktima ang ginkilala kay Roselyn Sulan, single, 27 anyos, isa ka mangunguma samtang ang amay naman sini amo si Richard Sulan, 51 ang edad kag isa ka manug isda.
Sandig sa interview sang DYHB kay Sagay City Deputy Chief of Police, Capt. Hannah Michelle Banquil, iya ginpahayag nga ‘misunderstanding’ ang motibo sa pagpatay sang amay sa iya sini nga anak
Sa ila inisyal nga imbestigasyon, natukiban nga yara lang sa sulod sang balay ang amay kag ginkadtuan ini sang iya anak kag gina alegar gin sukmatan.
Sa dalayon nga paglalisanay sang mga ini, hinali lang nagkuha sang espading si Richard kag ginlabo si Roselyn.
Suno kay PCapt. Banquil, utod gid ang kamot ni Roselyn, may mga labo man ini sa ulo kag sa iban nga parte sang iya lawas nga nagresulta naman sang iya kamatayon.
Boluntaryo man nga nagsurrender si Richard sa kapulisan diin magapangatubang ini sang kaso nga parricide.
