Lubos ang pagpasalamat sang himata sang lalaki nga nasapwan-patay bangud sa pagkalumos sa baybayon sang Cadiz City matapos nga ginsabat sang ciudad ang galastuhon sini papauli sa ila lugar sa Capiz.
Ang biktima sa pagkalunod ang ginkilala kay Ludovico “Udoy” Vasquez, 23 anyos kag residente sang nasiling nga probinsya. Madumduman nga sang Abril 24, nagpangayo bulig sa DYHB Sentro Serbisyo ang magulang sang biktima nga si Alona Vasquez agud makita si Udoy nga masobra isa ka semana na wala makapauli.
Apang sa pareho nga adlaw sang ginpanawagan ni Alona ang pagkadula sang iya manghod, didto man natukiban nga ang bangkay nga nasapwan nakaligad nga Abril 20 sa baybayon sang Barangay Daga, Cadiz City amo ang na kompirma nga lawas ni Udoy
Si Udoy ang may bipolar disorder kag ulihi ini nga nakita diri sa Bacolod matapos nga aksidente ini nga makasakay sa truck halin sa Ilo-ilo sadto pa nga Abril 12. Matapos mahibaluan ni Alona ang natabo, liwat ini nga nagpangayo bulig sa sentro serbisyo agud madul-ong naman pauli ang bangkay ni Udoy sa Capiz.
Didto ginpangitaan man paagi sang DYHB nga malab-ot si Cadiz City Mayor Bading Escalante. Diri ginpahayag sang alkalde nga ang ciudad na ang bahala magsabat sang lungon kag pag embalsamar kay Udoy. Ang mga papel naman angut sa pagbiyahe sang bangkay ni Udoy ang ginproseso na mismo sang Cadiz City Health Office.
Ang Barangay Daga naman sa pagpanguna ni Kapitan Lucien Bacomo Olvido ang magasabat sang pamasahe sang mga ini padulong Dumanggas port sa Iloilo. Subong nga adlaw natalana na nga magabiyahe pabalik sila Alona bitbit ang bangkay ni Udoy padulong sa ila puluy-an sa Capiz.
