MOISES PADILLA – Patay ang isa ka lalaki samtang pilason naman ang anak sini sa Sitio Coyaoyao, Barangay Inolingan, Moises Padilla Miyerkules nga adlaw, Abril 24, las 7 sang gab-i matapos ang mga ini ginpaarakan luthang sang tatlo ka mga wala pa makilal-an nga suspetsado.
Ang napatay nga biktima ang isa ka 37 anyos nga laborer. Samtang ang nasalabat naman amo ang iya 9 ka tuig nga anak nga babayi.
Sandig sa inisyal nga imbestigasyon sang kapulisan, nahibaluan nga yara sa sulod sang ila balay ang mga biktima sang hinali lang may nagpanuktok sa ila pirtahan kag nagsiling “ Si Karding ni mangayo kami tubig.”
Didto ginbuksan man sang amay ang pwertahan apang hinali lang ini ginpaarakan luthang sang isa sa tatlo ka mga suspek nga may dala long firearm.
Ang duha ka iban pa nga mga suspetsado ang nagsulod pagid sa balay sang biktima kag gin finishing ini.
Ang anak sang biktima nga yara sa likod sang iya amay kag nakasaksi sa krimen ang nasalabat kag naigo sang bala iya kamot.
Ginhingagaw pa dala sa ospital ang amay sang bata apang gindeklarar ini nga dead on arrival. Samtang ang menor de edad naman ang karon nagapabulong na sang iya pilas.
Natukiban nga nagpalagyo man hingagaw ang mga suspetsado padulong sa nabukid nga bahin sang lugar matapos sang mga ini gin ubra ang krimen.
Padayon man ang imbestigasyon sang Moises Padilla PNP sa nasiling nga insidente.
