Ginkondenar sang Department of Education (DepEd) ang pagkapatay sang 14 anyos nga babayi sa Barangay Cansojong, Talisay City, Cebu matapos ini ginluthang samtang ini siya ang naga sabat sang iya learning module sa sulod sang ila puluy-an.
Sa statement sang DepEd, pahayag sini nga wala dapat sang estudyante nga mabutang sa alang-alang ang seguridad bisan yara pa ang mga ini sa sulod sang eskwelahan ukon balay.
Sa inisyal nga imbestigasyon sang kapulisan, nahibaluan nga samtang nagasabat sa iya learning module ang biktima, hinali lang nagsulod ang isa ka tawo nga naka-mask kag didto na natabo ang pagpanluthang.
Nagpalab-ot man sang pagpakig-unong ang DepEd sa pamilya sang biktima angut sa natabo diin ila man ginpanawagan sa mga kapulisan nga tutukan kag padalman ang imbestigasyon agud madakop na ang may kahimuan sang krimen kag mahatagan man sang hustisya ang pagkapatay sang estudyante.
