Magahatag sang P100,000 nga padya si Congressman Atty. Dino Yulo sa sin-o man nga taga-5th District sang Negros Occidental nga maga-top one sa pagahiwaton nga mga licensure examinations.
Sa DYHB Eksperto Legal Program, ginpahayag ni Cong. Dino nga luyag sini nga magtinguha ang mga examinees nga magtuon indi lamang makapasar kag sa baylo, mag-excel kag manguna sa tanan nga nagkuha sang pasinawan.
Nahibaluan nga kabahin sang mga programa ni Yulo ang paghatag sang financial assistance sa mga pumuluyo sang ila nga distrito nga magakuha sang board ukon licensure examinations bangud nahangpan sini ang ila mga kagastuhanan.
Kadungan sang kapiyestahan sang banwa sang Isabela sadtong Sabado, may 460 ka mga examinees kun sa diin kalabanan magakuha sang licensure examination for teachers kag subong man engineers, nga nagbaton sang kutob sa P4,000 nga financial assistance gikan sa opisina ni Cong. Dino.
