Ginmandu sang Regional Director sang Police Regional Office-6, PB Jack Wanky sa Negros Occidental Provincial Police Office kag Sagay City Police Station ang ma-id id nga imbestigasyon angot sa kamatayon ni PSSg Lernie Alacha.
Si Alacha ang una ginreport ang gintiro sang iya pito ka tuig nga bata nga nagresulta sang kamatayon sang pulis.
Sa interview sang DYHB, ginpahayag ni Wanky nga dapat husisa-on sang maaayo sang mga imbestigador ang matu-od tuod nga natabu sa sulod sang puluy-an ni Alacha bangud nga mismo ang regional director sang kapulisan ang nagaduda nga mahimo ini sang pito ka tuig nga bata.
Paathag ni PB Wanky nga dapat kabigon nga persons of interest ang tanan nga yara sa sulod sang balay sang natabu ang amo nga shooting incident. Nagmandu man PRO-6 Regional Director nga ipa-idalum ang paraffin test ang tanan nga family members kag padalman man ang anggulo sang pahikog.
Dugang pa sang Regional Director nga dapat indi lang magconcentrate ang kapulisan sa kon sin-o lang ang ginhambal nga suspek, amo nalang ina gilayon ang tutukan.
Ginaremind man ni Wanky ang tanan nga kapulisan nga dapat responsalbe sila sa pagtago sang ila mga armas sa ila puluy-an nga indi mahapos nga malab-ot sang mga kabata-an.
